Monday, November 19, 2007

الجودة بالموجودة


مليار جنيه لرفع جودة التعليم بالجامعات المصرية

كثر الحديث الفترة الماضية عن مشروعات عملاقة للنهضة بالتعليم وإقالته من عثرته وباقي العناوين الرنانة التي تفاجأنا أو تفجعنا بها جرائدنا القومية وغير القومية بناء على التصريحات الوزارية المتعددة.
ورغم التصريحات الوردية واختلافها مع الواقع المعاش لازالت التصريحات تنهمر فوق رؤوسنا كالسيل وآخرها هذا الخبر المنشور على موقع مصراوي والذي يثير العديد من التساؤلات الشريرة

مليار جنيه لرفع جودة التعليم بالجامعات المصرية

فالحديث عن مشروعات تطوير وخلافه لايعدو أكثر من كونه سبوبة الهدف منها توزيع المزيد من الاموال على المحاسيب وأهل الحظوة من القائمين على عملية التطوير المزعوم خاصة في ظل إحكام قبضة الأمن على الجامعات المصرية والتخطيط لإلغاء مجانية التعليم والبدء بتطبيق اسلوب ماكر لتحويل التعليم الجامعي لتعليم خاص بمصروفات مرتفعة لمن يملك ومن لايملك ليس عليه ان يحلم بالتعليم.
الحقيقة ان الانسان ليقف مذهولاً أمام هذه الجرأة الشديد لاصحاب هذه التصريحات ولعبهم على ذاكرة القراء او المستمعين لهذا النوع من الهراء. ويستغرب أكثر ان ميزانية الدولة تنفق بسخاء على مشروعات معروف مسبقاً مصير مايُنفق فيها ونفس الدولة تبخل على جامعاتها بزيادة المدرجات والقاعات التي ضاقت بالاعداد الغفيرة من الطلاب الذين يجلسون على الارض في أغلب الاحوال.
وهكذا ياسادة تجود ميزانية الدولة بهذه المليار حتى تصبح الجودة بالموجودة وأهو مبلغ على قد ماقسم لزوم مسح زور اللجان المنعقدة واللجان المنبثقة واي لجان قد تظهر فيما بعد لزوم عملية التطوير وربنا يخلي لنا الميزانية .


16 comments:

قلم جاف said...

كأننا نشاهد إكليشيه المزاد في الأفلام العربية القديمة..

عشرين مليون جنيه..

عليا بواحد وعشرين مليون جنيه..

اتنين وعشرين أرنب ونص..

آلا أونا.. آلا دووي .. آلا ...

خمسة وعشرين ألف جنيه!

Unknown said...

اقولك على حاجة يا بيلا
أحد تخصصاتي في موضوع الجودة الشاملة
اقولك على سر المهنة
الجودة الناس فاكره إنها إجراءات لذلك الناس بتعمل الإجراءات بتاعتها على الورق زي الفل شغل حكومة يعني
في حين انها روح
روح اسمها الجودة، سلوك، لايف ستايل
تحسين مستمر
المليار اللي هيتصرفوا على جودة التعليم دول، مش عارف بالضبط هيعملوا بيهم ايه
بس تعرفي
كويس برضه اهو الورق يزيد
على فكرة البوست الجديد عندي فيه حاجة خاصة بالتعليم بس عيالي شوية كالعادة

أنا حر said...

اذا لم تستحي فاسرق ما شئت
يعني هو حد هيراجع وراهم كلها سرقة بمسميات مختلفة بس الجيوب واحدة والناس الساكتة برده واحدة
تحياتي

egy anatomist said...

التعليم وأحزانه.. ويا لها من أحزان

رغم أنها أحزان.. وأحزان تستحق أن نبكي دما ليل نهار على ملايين عقول تُسفَح على أسفلت الجهل وانخفاض المعرفة وضعف المهارة وهوان القدرة على المشاركة الفعالة في النشاط الاقتصادي الحديث.. فضلا عن قلة-أو قل ندرة أو انعدام إذا شئت- مفكرينا وأدباؤنا ومثقفينا وشعراءنا وكتابنا وأكملي ما تريدين: رسامون نحاتون مطربون ملحنون.. رغم كل هذا فإني لا أستطيع أن أملك نفسي من الضحك المتواصل من قلبي عندما أسمع عن خطط الحكومة-أي حكومة مصرية عبر عقود- لإصلاح وتطوير التعليم!! ليه بقى

لأني أتذكر عادل إمام عندما سأله عمر الحريري في الواد سيد الشغال عن كم يريد ليقوم بدور المحلل لابنته التي طلقها زوجها ثلاث مرات.. ويرد عادل إمام وهو يحاول الاستفادة من الموقف لأقصى درجة ويرى درجة ثراء الرجل الذي يعرض عليه أي مبلغ يريده.. فيقول بقوة وشعور بخطورة وكبر المبلغ الذي يطلبه: عملية زي دي ماخدش فيها أقل من عشرين جنيه!!! عشرين جنيه

هذه هي المليار جنيه التي خصصتها الحكومة.. أتخيل من أعلن الخبر وهو يشعر بالمفاجأة الفظيعة التي يحملها معه.. يقول أن الحكومة خصصت مليار جنيه مصري لتطوير التعليم.. ويستمتع برؤية الوجوه مذهولة والأفواه فاغرة والناس لا تصدق هول المبلغ!! مليار جنيه.. هوه فيه فلوس كده

مليار جنيه على خمس سنوات.. ليه.. لتطوير التعليم.. يعني 180مليون دولار تقريبا.. يعني ميزانية مدرستين في أي دولة عايزة تعلم ولادها تعليم يادوبك يخليهم يعرفوا ينافسوا في عالم مفتوح مفيهوش مكان إلا لأعلى المهارات والإمكانيات والقدرات

واحد هندي ملياردير من أربعة أشهر تقريبا قرأت في الفينانشال تايمز أنه تبرع بثلاثة مليار دولار لإقامة جامعة في مسقط رأسه في إحدى مدن الهند الفقيرة جدا.. 15 مليار جنيه مصري عشان جامعة واحدة.. بالمناسبة.. هذه الجامعة سوف تتخصص في ثلاثة فروع فقط.. ثلاثة فروع تخص العلوم الحديثة وتكنولوجيات الاقتصاد الجديد كالنانو والهندسة الوراثية الخ

مليار جنيه على خمس سنوات

15 مليار جنيه مرة واحدة لجامعة واحدة تتخصص في تلات اقسام فقط

لأ فعلا تطوير وجودة.. ليه البعزقة دي

واضح أن السادة المسؤولون عن التعليم غير مسؤولون بصفتهم مسؤولون.. واضح ان مفيش حد عنده أي فكرة عن التعليم اليومين دول عامل ايه في العالم

في مدينة اسمها بانجالور في الهند.. يتخرج كل سنة ربعمية ألف خريج جديد في الهندسة والتكنولوجيا فقط.. يتخرج في أمريكا كلها متين وخمسين ألف فقط.. معظم العيال بتاع الهند دول بيمضوا عقود شغل من سنة تانية.. بيمضوا مع مين؟ مع أي بي إم.. ميكرو سوفت.. أوراكل.. فايزر.. سيسكو.. وساعات ناسا وحاجات كده من بعد الشر عنا يعني

دولة صغيرة كماليزيا ميزانية التعليم فيها خمسة وعشرين في المائة من الناتج القومي.. يعني كام تقريبا.. يعني مائة مليار دولار تقريبا كل سنة.. ودول يا جماعة مش بيصلحوا ولا بيطوروا.. دول يا دوبك بيمشوا الحال

واحد هيقولي طب واحنا نجيب منين هوه احنا امريكا ولا ماليزيا حتى

ماليزيا لم تصبح ماليزيا إلا بالتعليم

من يتصور أن الديمقراطية تسود في ماليزيا يكون واهما.. مهاتير محمد ظل في السلطة ثم نقلها لرجل من اختياره هو وحده.. ومن يتابع الحال هناك يعرف أن هناك شبه ثورة شعبية واسعة من أيام اعتراضا على تزوير انتخابات وحاجات من ريحتنا كده

ما حصل هو أن مهاتير محمد خصص ربع دخل بلده لمدة خمسة وعشرين سنة للتعليم فقط

مش عشان المدرسة الذكية والوجبة الغذائية

عشان يعمل أعلى مستوى تعليم في الدنيا.. ربع الدخل ده كان حاجة قليلة جدا من خمسة وعشرين سنة.. لم يكن مية مليار دولار

احنا بقى ميزانية التعليم كام عندنا كام.. ميزانية البحث العلمي كام

مفيش داعي

المهم.. يا سادة.. الحل معروف وسهل.. أولا لازم فلوس.. فلوس بجد.. التعليم أعلى استثمار في الدنيا لأي دولة.. إسرائيل تنفق على طالب الابتدائي واحد وتمانين ألف دولار سنويا.. ومصر تنفق على طالب الجامعة ثمانتلاف جنيه ينطح أخوه

يبقى قلنا فلوس.. اللي يخصص زينا 6 في المية من ميزانيته للتعليم ده يبقي دولة زي اليابان مثلا أو كندا وتكون كمان ناوية تتقهقر وتتبهدل.. انما اللي عايز ينمو ويتقدم يا دوبك ربع الميزانية أو تلتها على الاقل لسنوات طويلة

نعمل ايه بالفلوس.. دي نقطة تانية ومحتاجة شرح طويل.. بس خلاصتها ان مش هنخترع العجلة.. نشوف البني آدمين اللي فلتوا من الفقر والجهل عملوا ايه ونعمل زيهم

يا سيدتي كيف يكون عندنا في مصر آلاف منك يهتمون بالتعليم ويطنونه أخطر قضية أمن قومي

تحياتي دائما لك وكل احترامي

He and She said...

Egy anatomist, your comment amused me. You really dissected the point like a professional anatomist. ta7eya le Bella sa7bet el post

اسامة يس said...

من اجل الشعب والثورة والجماهير العريضة .......
اقصد من اجل العلم والطلبة والمدارس المديدة...

لا بصدق هي كما ذكرتم من اجل التزوير والسبوبة والنهب المقيم...

وحسبنا الله ونعم الوكيل

Bella said...

قلم جاف

مرحبا بك

لو كانت هذه المليار ستصرف فعليا على رفع جودة التعليم لقلنا لاباس

ربنا ينفخ في صورتنا والمليار تبقى اتنين وتلاتة وطولة البال تبلغ الامل

لكن المصيبة ان هذه الاموال سيتم صرفها على المحاسيب والهليبة اذين يظهرون في هكذا مناسبات

Bella said...

يوميات عيل مصري

مرحبا بك

المصيبة ان الناس بعضهم عارف انها اجراءات وعلشان كده بيعمل بالطريقة التقليدية في تسديد الخانات وكله تمام يافندم والمستندات بتقول كده

لكن في المقابل هناك عدد غير قليل يعرف ان الجودة اسلوب حياة ويحاول تطبيق مايستطيع

الكارثة الحقيقية ان القليل اصحاب مبدأ تسديد الخانات هم من يملكون القرار وبيدهم المنع والصرف

سأرجع لتدوينتك الاخيرة

تدويناتك ممتعة جدا ولك اسلوب متدفق في الحكي احييك عليه

Bella said...

أنا حر

مرحبا بك

حلوة اذا لم تستح فاسرق ماشئت

ممكن نعمله شعار المرحلة

ههههههههههه

الحقيقة ان عدد غير المستحين وصل لرقم قياسي غير مسبوق

اما سكوت الناس فهذا هو الطبيعي
تصور ناس تسكت عن غلاء الاكل والشرب ولا تتحرك بسبب الجوع

هل تتوقع ان يتحركوا وينبض لهم عرق من أجل التعليم

يشاهدون يوميا الملايين المهدرة وكل مايستطيعون فعله مصمصة الشفاة والجملة المأثورة اياها

ياعم بلدهم وهم حرين فيها

وكأننا مش من البلد دي ولا لنا حق فيها

Bella said...

egy anatomist

مرحبا بك

احييك على هذا الرد المستفيض الشامل الذي يصلح تدوينة بمفرده

الحقيقة ان المليار مبلغ كبير جدا على الصرف في هكذا بند ليس لعدم رغبتنا في تطوير التعليم لاسمح الله
ولكن لعلمنا ان المليار لن يتم تقسيمه على خمس سنوات كما تقول الخطة وكما يقول الورق
ولكن سيتم تقسيمه على المشاركين ولايهم المدة حيث انه بمجرد انتهاء المبلغ سينتهي الحديث عن مولد التطوير ولن يتحدث أحد عن الست جودة او قريبها السيد مميز او اي فرد من افراد هذه العائلة التي ظهرت في حياتنا لزوم الشيئ

والدفاتر دفاترنا والورق ورقنا وسيتم تسديد الخانات وكله تمام
تمام كله

وبعد نهاية المدة سيكون الوزير قد خرج من الوزارة او لم يخرج سيان لانه لن يحاسبه احد ولن يقل له احد اين ذهبت هذه المليار كما ذهب غيرها.

اما البلاد التي تحدثت عنها فنحن لسنا مثلها لاننا لانريد ان نتعلم بحق

كل مانريده او ماتريده الاغلبية الساحقة الحصول على صك او ختم انهم مروا من امام الجامعة الفلانية والدليل هذا البرواز المعلق في الصالون

اما مايعرفه الخريج فعليا فالحياة كفيلة بتعليمه

وهذه نظرية تعليمية اسرية تربوية تهييسية شغالة في مصر من زمان

الغرض الحصل على لقب وخلاص

ولا يهم المستوى الحقيقي او الفعلي لان السيد الوالد والست الوالدة كما تكفلا بدفع مصاريف المحروس او المحروسة سيتكفلا ايضاً بتوفير العمل المناسب واهو الولد يتسلى شوية لغاية مايتودك ويتعلم

والبنت تتسلى شوية لغاية مايظهر ابن الحلال وانتهينا

هذا هو المنطق السائد في حياتنا
سواء التعليمية او حياتنا في اي مجال آخر

ولهذا لن نتقدم قيد أنملة طالما ظل هذا اسلوبنا في الحياة

أحييك مرة اخرى على ردك المتخصص المدعم بالاسانيد

تحياتي

Bella said...

He & She

مرحبا بك

اتفق معك في رايك بخصوص رد اخينا العزيز واشكرك على رايك في التدوينة

تحياتي

Bella said...

osama

مرحبا بك

انت عارف ان كل مولد وفيه محاسيب ومطبلاتية ومهللاتية
يعني عايزهم يتعبوا قلبهم ببلاش يعني ولا ايه

ثم تعليم ايه وجودة ايه اللى بندور عليها والطلبة اصلا مش عايزين يتعلموا

عايزين يااما يطلعوا ممثلين يااما لعيبة كورة

والبنات بقى الرقص قادم لامحالة

عيال عملية وعارفين طريقهم

هههههههههههههه

قال جودة قال

not crazy said...

موضوع جرئ بس ممكن بلاش العتاب للفنان عمرو دياب



بهزر بجد تستاهل القراءه بس اعرف الا قيك

Shreef said...

بئى مليار جنيه بس الناس ديه اكيد بتستهبل طبعا مليار جنيه مبلغ بسيط لو عايزين نطلع التعليم بتاعنا من الوكسة اللي هوا فيها لكن للاسف المشكلة مش في الفلوس المشكلة في الناس اللي هتستخدم الفلوس ديه دا طبعا على اساس ان احنا هنتكلم في الحالة المثالية و مفيش فساد ولا منافع خاصة ولا اي حاجة هتلاقي الفلوس ديه هتتصرف على جلسات و ندوات و لجان و حوارات في رأيي الشخصي لا بتودي ولا بتجيب..و بالنسبة لحوار الجودة كان العميد بتاعنا ماشي في الحوار ده و كان ابتدى يطبق بعض الحجات اللي كانت هيستخدمها للحصول على اعتماد الجودة من مكان كدا من النجلترا مش فاكر ايه بصراحة الحقيقة الشغل اللي كان بيتعمل لو اتعمل فعلا من ناحية الموظفين بضمير و اتاخد بردو بعد كدا بضمير هيكون ممتاز و فعلا هيؤدي لنتائج جميلة و لو اضرب مثال كان في نهاية كل تيرم كنا لازم نعمل تتقييم للدكاترة و لكل مادة بما يتعلق بطريقة التدريس و المواد اللي بتتدرس نفسها و حاجات كتير متعلقة بالمكان و المواعيد و الحوارات ديه و بصراحة كانت بتم بحرية كاملة و كنا احنا سعيدين بحاجة زي كدا لكن للاسف زي ما واحد كان بيقول في التعليقات كله تخليص ورق مش اكتر علشان لما ييجوا بتوع الجودة يشوفوا التقيمات ديه و يقولوا ان ديه خطوة تمت فعلا و اللي عرفناه طبعا بعد كدا ان الورق ده ممكن يكون بيتقري فعلا من قبل الادارة لكن كان في مشكلة تانية ان الادارة و هما كلهم بينهم و بين بعض كانوا بيتحرجوا يقولوا لكل دكتور القصور اللي عنده و ان لازم يحسنه طبعا مهم مش هيقللوا من شانه لان كل واحد فاكر نفسه خليفة اينشتين ولا نيوتن على الارض فالمشكلة في القاشمين على اساليب اعتماد الجودة مش في حتى في كم الفلوس اللي المفروض تتصرف على كدا..بصراحة الموضوع ده يطول الحديث عنه..فما علينا..يلا سلام يا بيلا

mesh2dra said...

السلام عليكم

والله على رأيك
بس هى جت على التعليم

ما بيعملوا لجان تنبثق منها لجان تنبثق منها اخرى الي ان يرحمنا الله
وكل ده عايز مصاريف
وكأنهم بيختلقوا أى حجة للصرف
بس ياريته صرف على المليان

ما بنى على باطل فهو باطل
واللي بيحصل ده مش تعليم اصلا
المفروض يتكلموا في كيفية تغيير النظام برمته

سلاماتي

Unknown said...

السلام عليكم ورحمة الله ليه دايما المصريين معتقدين ان المصريين لازم يكونو ذوى ذمة خربة وليس لديهم ضمير ولا يلتفتون الى شئ سوى التهليب هما مش المصريين دول انا وانت وابى وابيك وامى وامك واخى واخيك واختى واختك والا هما حد تانى.
ده عن اولا
اما عن ثانيا
فأنا عايز اسأل ليه بنهاجم شئ بدون ان ننظر الى خلفياته وندرس ما هى نتائجه وماذا ستعود علينا جميعا ونحاول خنق مولود فى مهده هذا هو السبب الأساسى لكون الهند والصين انجح منا مع اننا اساس الضارة ولا تهزاء من هذا التعبير لانه شئ موثق ومعروفوليس مجرد شعارات.
اما التساؤل الذى يطرحه الأغلبية العظمى من الناسالذين يتسألون اين كانت السيدة جودةالتعليم من قبل وايه اللى خلى الحكومة تهتم بيها دلوقتى .
فالسبب هو ان جميع الدول المتقدمة الأن لاتعترف بالشهادات المصرية مما ضر بالكثير من الأعمال المصرية.
وفى نطاق الكلام عن المليار جنيه فاقراء يا سيدى نص القاتون الخاص بأنشاء الهيئة وستجد ان هذا المبلغ هو لبدء العمل فقط وأن تلك الهيئة ستقوم بالصرف من مواردها المحددة فى القانون وليس من موارد الدولةومن البحث فى هذا الموضوع وجدت ان الهيئات التعليمية المصرية تقوم باعتماد نفسها فى هيئات اجنبية وتدفع لها مبالغ طائلة فى سبيل قيام هذه الهيئات الأجنبية بمتابعتها سنويا وتأكيد اعتمادها.
لذا فأن انشاء هذه الهيئة سيقلل من المدفوع فى الأعتماد وسيدخله الى ميزانية الدولة وليس عكس ما هو مفهوم.
مع العلم اننى مواطن مصرى عادى جدا وليس لى اى انتمائات حزبية او دينية او غيرهاولكننى وجدت اننى لابد ان افهم وخاصة بعدما قراءت ما هو منشور فى مدونتكم والمدونات شئ عظيم ولكن اعتقد ان الموضوعات والأراء لابد من ان يقوم كاتبوها بتحرى الأمر والتأكد من ما يقولون.
لقوله تعالى : ( يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين ) صدق الله العظيم
وشكرا جزيلا على اتاحة المكان لعرض رأى مواطن مصرى